თურქული სერიალი "ეზელი", რომელიც "პალიტრა TV"-ის ეთერში ყოველ სამუშაო დღეს, 19:30 საათზე გადის, მაყურებელმა უკვე შეიყვარა. სიყვარულის, მეგობრობის, ღალატისა და შურისძიების ისტორია, დაძაბული სიუჟეტი და თურქეთის ულამაზესი კადრები - ვინც სერიალის ყურებას იწყებს, მას ბოლო სერიამდე ვერ წყდება.
უამრავ ქვეყანაში, სადაც "ეზელის" ჩვენება შედგა, განსაკუთრებულად მსახიობი ქალების სილამაზეს აღნიშნავენ.

როდესაც "ეზელის" გადაღება გადაწყდა, სერიალის პროდიუსერმა კარიმ ჯატაიმ გადაწყვიტა,  ერთად შეეკრიბა თურქეთის ულამაზესი ქალები. ჯატაიმ მსახიობების კასტინგის პროდიუსერებს მოსთხოვა, მოენახათ თურქი მოდელები, რომლებიც ევროპულ პოდიუმებზე გამოდიოდნენ. ასე მოხვდნენ სერიალში ჯანსუ დერე, ბადე იშჩილი და ბერაკ ტუზუნატაჩი.

ჯანსუ დერე, რომელმაც ქალის მთავარი როლი მიიღო, იმ მომენტისთვის უკვე რამდენიმე ფილმსა და სერიალში იყო გადაღებული, მაგრამ მაინც, როგორც მოდელი იყო უფრო ცნობილი. ეიშანის როლმა კი მას არნახული წარმატება და დიდი სარეკლამო კონტრაქტები მოუტანა. სწორედ ამ დღეებში ჟანსუ დერე,  როგორც L’OrÈal Paris-ის სახე, კანის საერთაშორისო კინოფესტივალზე იმყოფება.

მეორე მოდელი, რომელიც "ეზელმა" ცნობილ მსახიობად აქცია, ბადე იშჩილია - სერიალში შებნები, რომელიც ეზელს შურისძიების განხორციელებაში ეხმარება. 29 წლის ბადე დღეისთვის ცნობილი მსახიობი და რამდენიმე თურქული ბრენდის სახეა. "ეზელის" ეკრანებზე გამოსვლის შემდეგ მისი პირადი ცხოვრებაც აეწყო: მან გაიცნო ბიზნესმენი მალკოჩ სუაპი და 31 მაისს მთელი თურქეთი მათ ქორწილს ელოდება.

ბერაკ ტუზუნატაჩი სერიალში ჯერ არ გამოჩენილა. წინასწარ არ ვიტყვით, რა როლი ექნება ბერაკს, თუმცა გარწმუნებთ, რომ ის აუცილებლად მიიქცევს ეზელის და მაყურებლის ყურადღებას. ულამაზესი თვალები, არაჩვეულებრივი ტანი, სამსახიობო ნიჭი - ამ ყველაფერმა დღეისათვის ბერაკ ტუზუნატაჩი თურქეთის ერთ-ერთ ცნობილ და მდიდარ ქალად აქცია. მისი ფოტოები Marie Claire-ისა და Vogue-ის ყდებს ამშვენებს. 2012 წელს ბერაკი თურქეთის ყველაზე სექსუალური ქალების ტოპ-10-ში შევიდა.

დაბოლოს, თავად ეზელის როლის შემსრულებელი - კენან იმირზალი ოღლუ, რომელიც თურქეთის ყველაზე მაღალანაზღაურებადი მსახიობია, ასევე რამდენიმე ბრენდის სარეკლამო სახეა, მათ შორის, Pepsi -ისა და KIP-ის.
წყარო:http://www.marao.ge/sakithkhavi/siakhle/4392-serial-qezelshiq-thurqethis-yvelaze-lamazi-msakhiobi-qalebi-thamashoben-foto.html