საქართველოში სულ უფრო მეტი პოპულარობით სარგებლობს თურქული სერიალები. ამჯერად ერთ-ერთი მათგანის, სერიალ "1001 ღამის" მთავარი გმირების შესახებ გიამბობთ.
ხალიტ ერგნეჩი ფილმში მომხიბვლელი, მამაკაცური და ძალაუფლების მქონე ბიზნესმენის, ონურის როლს ასრულებს, რომელსაც ერთი დანახვით შეუყვარდება დამწყები თანამშრომელი შეჰერეზადი. მას მშვენიერი ბერგიუზარ კორელი ასრულებს.

სერიალში მათი სიყვარულის ისტორია საკმაოდ დრამატულად იწყება: კომპანიის ხელმძღვანელი ახალ თანამშრომელს, 150 000 დოლარის სანაცვლოდ, ერთი ღამის გატარებას მოსთხოვს. არადა, ქალს თანხა ლეიკემიით დაავადებული შვილის გადასარჩენად სჭირდება.

ძალიან ხშირად მსახიობებს შორის რომანი სწორედ გადასაღები მოედნიდან იწყება. აქაც ასე მოხდა. ხალიტსა და ბერგიუზარს სწორედ ამ ფილმის, "ათას ერთი ღამის" გადაღებებისას შეუყვარდათ ერთმანეთი.

თუმცა ამჯერად ამ მშვენიერი ზღაპრის დასაწყისი არც ისეთი ლამაზი იყო. საქმე ისაა, რომ ხალიტ ერგნეჩი, ბერგიუზარ კორელისგან განსხვავებით, ამ დროს დაოჯახებული იყო. ის 2008 წელს ახალგაზრდა სტუდენტზე, გიზემ სოისალზე დაქორწინდა, თუმცა ქორწინება ბედნიერი არ აღმოჩნდა და წყვილი მალევე დაშორდა ერთმანეთს. სავარაუდოდ, სწორედ ბერგიუზართან გაბმული რომანის გამო დაანგრია ხალიტმა ოჯახი.

ხალიტის პირველი ცოლი მოგვიანებით ალაპარაკდა და განაცხადა, რომ დიდხანს უარყოფდა მოარულ ხმებს მისი ქმრის რომანის შესახებ, მაგრამ ბოლოს, როცა საკუთარი ქმარი მეგობრის ქორწილში სხვა ქალთან ერთად ნახა, საბოლოოდ დარწმუნდა, რომ ჭორები სიმართლეს შეესაბამებოდა და ცოლ-ქმარმა განქორწინებაზე შეიტანა განცხადება. ხალიტის გავლენით, გიზემ სოისალმა 1,5 თვის მუცელი მოიშალა.

ასე დაიწყო ხალიტსა და ბერგიუზარს შორის სერიოზული ურთიერთობა. მათი რომანი დასაწყისშივე ძალიან შესამჩნევი გახდა. ისინი არ მალავდნენ გრძნობებს, ერთად ჩნდებოდნენ საზოგადოებაში.

ხალიტისა და გიზემის განქორწინებიდან რამდენიმე ხანში, შეყვარებულებმა გადაწყვიტეს, დაეკანონებინათ ურთიერთობა. ხალიტ ერგნეჩისა და ბერგიუზარ კორელის ქორწილი 2009 წელს სტამბულის ერთ-ერთ ფეშენებელურ სასტუმროში გაიმართა.

მალე ბერგიუზარმა ხალიტს ვაჟი გაუჩინა და მან საკუთარი თავი მთლიანად ოჯახს მიუძღვნა.