როგორც იცით, სერიალ "დიდებული საუკუნის" ბოლო სეზონში ჰიურემ სულთანის როლის შემსრულებელ მერიემ უზერლის სხვა მსახიობი, ვაჰიდე ჰერდიუმი ცვლის.

თუმცა ეს უკანასკნელი სასტიკად არ მოსწონთ სერიალის გულშემატკივრებს და ფილმში ძველი ჰიურემის დაბრუნებას ითხოვენ.

ახალ ჰიურემ სულთანს მაყურებელი 103-ე სერიიდან იხილავს.

სერიალის ფანებმა მერიემის შემცვლელის ეკრანზე ხილვისთანავე გამოხატეს უკმაყოფილება. ისინი მსახიობ ვაჰიდე ჰერდიუმის გარეგნობას აკრიტიკებენ და ამტკიცებენ, რომ იგი ზედმეტად ასაკოვანია ამ როლისთვის. ამას გარდა, "ამბოხებულები" ამტკიცებენ, რომ ეს როლი უზერლისთვის იყო ზედგამოჭრილი და ჰიურემ სულთანს სხვა მისნაირად ვერ განასახიერებს.



უკვე ცნობილია, რომ ამის გამო სერიალის მიმართ ინტერესმა საგრძნობლად იკლო. სერიალის ფანები სოციალურ ქსელებში ფილმის პროდიუსერებს დაუნდობლად აკრიტიკებენ ამ ცვლილების გამო.

ცნობილია ისიც, რომ მერიემის ფანები ვაჰიდე ჰერდიუმს მუქარით სავსე წერილებს უგზავნიან. მსახიობი მშვიდად ხვდება ამ მოვლენებს და არ აპირებს სერიალის დატოვებას.