ერთ-ერთი ყველაზე გახმაურებული თურქული სერიალის, "დიდებული საუკუნის" მომდევნო სერიებში მთავარ გმირს, ჰიურემ ხათუნს სხვა მსახიობი განასახიერებს.

გერმანული წარმოშობის მსახიობმა მერიემ უზერლიმ პროექტის დატოვების მიზეზებზე ისაუბრა. აღმოჩნდა, რომ მერიემი გადაღებების დროს დაფეხმძიმდა! ამის შესახებ მსახიობმა მეგობარს, უმსხვილესი თურქული გამომცემლობის, Hurriyet-ის ჟურნალისტს აიშე არმანს უამბო. გთავაზობთ გულახდილი ინტერვიუს ფრაგმენტს.

- ამით ჩემს კარიერას ჯვარი დავუსვი, თუმცა შვილი მირჩევნია. ყველაფერი დაუგეგმავად მოხდა, - ამბობს მერიემ უზერლი მეგობართან ინტერვიუში.

ახლა მსახიობი შესანიშნავად გამოიყურება. სადად გადაწეული თმა, თავისუფალი კაბა, რომელიც 4 თვის ორსულს ძალიან უხდება და უმაკიაჟო სახე ბედნიერებისგან უბრწყინავს. არადა, სულ რაღაც რამდენიმე თვის წინ მერიემს თვითმკვლელობის მცდელობა ჰქონდა...

ეს ამ წლის აპრილში მოხდა, როცა ანტალიაში სატელევიზიო პრემიის დაჯილდოება ტარდებოდა. მერიემი საუკეთესო დრამატულ მსახიობად აღიარეს.

- დაჯილდოების შემდეგ სასტუმროს ნომერში ავედი და... ჯილდო დავამსხვრიე. აივნიდან გადახტომა მინდოდა და ყველაფრისგან გათავისუფლება! – იხსენებს მსახიობი.

ძლიერი დეპრესია მსახიობს მხოლოდ გადაღლილობისგან არ დამართნია, საყვარელ ადამიანთან ურთიერთობაც დაეძაბა. მისი რჩეული ჯან ატეში გარეწარი აღმოჩნდა. როცა გაიგო, რომ მერიემი ორსულად არის, ყველა გზას მიმართა, რომ მსახიობს ბავშვი მოეშორებინა.

- მე არ დამიგეგმავს ბავშვის გაჩენა, სერიალის მეოთხე სეზონის გადაღებები წინ მქონდა, მაგრამ ასე მოხდა. როცა ჯანმა ამის შესახებ გაიგო, აბორტზე დაიწყო ჩემი დაყოლიება.

ჯანს ჰყავს უკვე ორი შვილი და მესამე არ სჭირდებოდა. მას მიზეზად ისიც მოჰყავდა, რომ როცა ფილმის პროდიუსერები მერიემის ფეხმძიმობის შესახებ შეიტყობდნენ, კონტრაქტის დარღვევისთვის მსახიობს პასუხს აგებინებდნენ.

- მაგრამ ვერ შევძელი ბავშვის მოკვლა და გავიქეცი, - ამბობს მსახიობი, - შევიძინე სახლი ბერლინში და თურქეთი დავტოვე. ისედაც ვანერვიულე ჩემი პატარა უარყოფითი ემოციებით. მსგავსი აღარ განმეორდება.

უცნაურია, მაგრამ მერიემი არ არის გაბრაზებული ყოფილ მეგობარ მამაკაცზე.

- უნდა შეძლო პატიება, თორემ ბოღმა საშინელი ტვირთია. ჩემი ენერგეტიკის გასასუფთავებლად ჯანის ვაპატიე. თუმცა ის ვეღარასოდეს შემოვა ჩემს ცხოვრებაში.

მეგობართან ინტერვიუს დროს მსახიობს არ დავიწყებია თავისი მილიონობით თაყვანისმცემელი.

- მინდა ბოდიში მოვუხადო სერიალის თაყვანისმცემლებს. ჰო, მე დამნაშავე ვარ, მაგრამ ახლა უკეთ ვარ. ნუ გამიბრაზდებიან მაყურებლები. დიდხანს მაინც არ მომიწევდა მეოთხე სეზონში ყოფნა – სიუჟეტის მიხედვით, სულთანი ჰიურემი ასაკშია და პროდიუსერს გადაწყვეტილი ჰქონდა მსახიობის შეცვლა უფრო ასაკიანი ქალბატონით. მე აღარ ვარ ჰიურემი, კვლავ უბრალოდ მერიემ უზერლი ვარ...
wyaro:http://www.marao.ge/sakithkhavi/interviu/5154-hiuremis-rolis-shemsrulebelma-suicidis-gamo-qdidebuli-saukuneq-datova-msakhiobis-gamosamshvidobebeli-sityva-mayurebels.html