დათო ფორჩხიძესა და მაია დარსმელიძეს შორის ომი გამოცხადდა?

"მაპატიეთ, თუ ყელში ამოგივიდათ დათო ფორჩხიძე, მაპატიეთ, რომ ისევ მოგება მინდა", – ასე მიმართავს მუსიკოსი დათო ფორჩხიძე ყველა იმ ადამიანს, ვინც მის მიმართ აგრესიას გამოხატავს. ასეთები კი მის ახლო წრეშიც არიან. პროექტი "ახალი ხმა" დაიწყო და მწვრთნელებს შორის დაპირისპირება უკვე აშკარაა. დათო ფორჩხიძის მისამართით უარყოფითი კომენტარებით მაია დარსმელიძე და სტეფანე გამოირჩევიან. დათო არ უარყოფს, რომ მათ შორის მწვავე კონკურენციაა და ის და სტეფანე ხშირად "გულახდილადაც ლანძღავენ" ერთმანეთს, მაგრამ იმან, რაც რამდენიმე დღის წინ მაია დარსმელიძემ "ფეისბუქში" დაწერა, ყველა ზღვარს გადააჭარბა: "იმის გამო რომ კონკურსანტი ჩემს თიმში მინდოდა, და უმრავლესობაც ამაში მეთანხმებოდა ზოგიერთმა დაბოღმილმა რამხელა ამბავი ამიტეხეს... თურმე დათო ფორჩხიძეა მსხვერპლი და მე მას ვძირავ. მართლა თქვენი დედა მ... სხვისი 20 წლის წინ გაკეთებული დღემდე გახსოვთ და ჩემს დღევანდელ ნამუშევარს შეგნებულად არ იმჩნევთ??? ასე ვის ეშინია ჩემი, ამხელა (თავისჭკუაში) "შავი პიარი" რომ ამიგორა??... მ.......თ ყველა კარგი დასაწყისის წარმატებით გაბანძების ნიჭი..." (სტილი შეძლებისდაგვარად დაცულია. რედ.).
– დათო, დავიწყოთ იმით, "ახალი ხმის" მონაწილეები როგორ მოგწონთ. წინა სეზონის კონტინგენტზე ძლიერები არიან თუ სუსტები?
– ვინ უკეთესია და ვინ – უარესი, ამაზე ლაპარაკს ვერ დავიწყებ. წინა კონკურსანტებს თავიანთი ხიბლი ჰქონდათ, ამათ თავიანთი აქვთ. მაყურებელმა განსაზღვროს, ვინ ვის სჯობია. ამ სეზონზეც არაჩვეულებრივი ბავშვები მოვიდნენ.
– კულისებმიღმა დაძაბული სიტუაციაა?
– შიდა სამზარეულო იმიტომ არის შიდა, რომ ინფორმაციები გარეთ არ გავიდეს.
– მაგრამ მწვრთნელებს შორის დაპირისპირება უკვე ეკრანზეც ჩანს და "ფეისბუქშიც". სინამდვილეშიც ასეა?
– ჩვენ ყველას ჩვენი სიმართლე გვაქვს და საკუთარი თავი გვგონია ყველაზე პატიოსანი, ნიჭიერი და პროფესიონალი. თუმცა ოთხივემ ვერ გავიგეთ ერთი რაღაც: მწვრთნელი მნიშვნელოვანია, მაგრამ კონკურსანტი იმარჯვებს. ამას თუ ჩავწვდებით, ურიგო არ იქნება.
– უფროსების "ახალ ხმაშიც" თქვენი გუნდის წევრმა გაიმარჯვა და საბავშვო "ახალ ხმაშიც". ახლა რა პროგნოზებს აკეთებთ?
– როგორც ვხედავ, ჩემი წარმატებებით ბევრი დაიღალა, ბევრს ნერვებსაც ვუშლი...

– ამ ფრაზებით ვის უგზავნით მესიჯს?
– იყო ასეთი ფრაზა – ეს დათო ფორჩხიძე ამოვიდა ყელში, მასთან ნიჭიერი ბავშვები მიდიან, ისინი იმარჯვებენ და ამას იფერებსო... ერთი ვერსიით, თურმე დათო იმიტომ იგებს, რომ მასთან ნიჭიერი ბავშვები მიდიან. მეორე ვერსია ასეთია: დათო რომ იგებს, მასთან ნიჭიერი ბავშვები იმიტომ მიდიან.
შესაკრებლები გადავაადგილე და ჯამს ვერ მივხვდი. ვერ მივხვდი, რატომ ვიგებ. რეალურად მე არაფერს ვიგებ, პირველი სეზონი მოიგო სალომე ქათამაძემ, რომლის ცხოვრება უკეთესობისკენ შეიცვალა. საბავშვო "ახალი ხმა" რეზიკო დიდებაშვილმა მოიგო და მისი ცხოვრებაც უკეთესობისაკენ შეიცვალა. ამაში რა არის ცუდი?
– მაშინ ამ ვერსიების უკან რეალურად რა დგას?
– წარმატების სურვილი. ჩვენ ყველა ვცდილობთ, რომ ჩვენი თავი და ჩვენი როლი ვაჩვენოთ. რა დგას უკან, არ აქვს მნიშვნელობა, მთავარია, წინ რა დგას. ვამაყობ სალომე ქათამაძის წარმატებით იურმალაზე. მას ბევრი წინაღობა შეხვდა საქართველოდანაც და კონკურსიდანაც, მაგრამ ამ გოგომ არ შეგვარცხვინა, თავი აჩვენა იმ დონეზე, როგორც ჩვენ გვეკადრებოდა. ჟიურის წევრები სცენიდან გვიხდიდნენ ბოდიშს, გამარჯვება ამ გოგოს ეკუთვნოდაო. ამიტომ მითხარით, მე რატომ უნდა შემრცხვეს? რატომ ჩავთვალო, რომ არასწორად ვიქცევი? ამას ვერ ვხვდები.
– ბრმა კასტინგზე, როცა ერთ–ერთმა კონკურსანტმა თქვენ აგირჩიათ, მაია დარსმელიძე ღიად დაგიპირისპირდათ და ის კონკურსანტი გააფრთხილა, ამ არჩევანს ინანებო.
– კონკურსანტ მარიამ პავლიაშვილზეა საუბარი. პროექტში იგებს ერთი, მათ ისღა დარჩენიათ, დაელოდნონ შოუს დასრულებას და უთხრან, აი, ხომ ინანეო. ისიც გაჟღერდა, ჩემთან წამოდი და ფინალში გახვალო. შარშან რამდენიმე ფინალისტი იყო და უთანასწორო ბრძოლა გაჩაღდა იმიტომ, რომ აშკარა ლიდერები სალომე ქათამაძე და ნინი ცნობილაძეიყვნენ, დანარჩენი ორი ჩრდილში მოექცა. ეს ხელოვნებაა და ცარიელი პრაგმატიზმი არ არის. მაია დარსმელიძეს ძალიან უნდოდა, შოთა ადამაშვილი მასთან წასულიყო. მეორე დღეს "ფეისბუქზე" გაავრცელა "სიყვარულით" აღსავსე სტატუსი, რომ შოთას "დიდი დავითი" ჰყავს და ის საიმედო ხელშია. დიდი მადლობა, არ არის პრობლემა! ბევრი ნიჭიერი ბავშვი წასულა სხვა მწვრთნელთან, მაგრამ არასოდეს მიკადრებია, მისთვის მეთქვა, შენ ამ ნაბიჯს ინანებ–მეთქი. მაგალითად, წინა სეზონის კონკურსანტ ნუკრი მენთეშაშვილთან არ მივსულვარ და არ მითქვამს, რატომ ჩემთან არ წამოხვედი და მაია და სტეფანე რატომ აირჩიე–მეთქი. ყველა მწვრთნელის გადაწყვეტილებას პატივს ვცემ.
– როგორც ჩანს, მწვრთნელებს შორის კონკურენცია აშკარა დაპირისპირებაში გადაიზარდა.
– ლელასთანაც (წურწუმია), მაიასთანაც და სტეფანესთანაც ცივილური ურთიერთობა მქონდა, თუმცა ახლო მეგობრები არასდროს ვყოფილვართ. ეს იმას არ ნიშნავს, რომ რომელიმე მათგანს პატივს არ ვცემ ან ხელწამოსაკრავ ძალად ვთვლი. ისინი ღირსეული კონკურენტები არიან. ხშირად მეუბნებიან, რომ დიპლომატი ვარ. რა არის დიპლომატიაში ცუდი? აბა, ვლანძღო ისინი? მართლა ანგარიშს ვუწევ მათ. ამის გამო ამბობენ, რომ მე ასეთი საქციელით ქულებს ვიწერ და ხალხის გულს ვინადირებ. მთელი ევროპა და ამერიკა, საითკენაც ჩვენ ასე მივილტვით, ცივილიზებული ურთიერთობით აღწევენ წარმატებას, ერთმანეთის დაფასებით იგებენ ბევრ რამეს. არ ვიცი, რატომ მეძახიან მლიქვნელს და ფარისეველს. იმიტომ, რომ არ ვლანძღავ სტეფანეს? არც გავლანძღავ!
რაც შეეხება დაპირისპირებას, არავითარი დაძაბულობა არ გვაქვს, მაგრამ, რა თქმა უნდა, სტეფანეს და მაოს ნერვები ეშლებათ, მაგრამ ასეთია შოუს პრინციპი, როცა ისინი მჯობნიან, მეც მეშლება ნერვები. ეს არის შემოქმედებითი რინგი.
– სოციალურ ქსელში თქვენს ურითიერთობებზე ბევრი არასასიამოვნო რამ იწერება...
– მტრები ჩვენ ვერ გავხდებით და იმედია, ერთმანეთს სადარბაზოსთან არ დავხვდებით. სტეფანე იმდენად აქტიურად აჩვენებს ხალხს დაძაბულობას, რომ ბევრს მართლა ჰგონია, რომ ერთმანეთს ვერ ვიტანთ. გულის სიღრმეში შეიძლება სტეფანე ფიქრობს, ამ ფორჩხიძემ ტვინი წაიღო, ნერვებს მიშლისო (ამას იფიქრებს, ეს გარდაუვალია), მაგრამ ის, რომ ერთმანეთის მტრები ვართ, ტყუილია. თუ სტეფანეს ცხოვრებაში ყველაზე ნეგატიური მოვლენა დათო ფორჩხიძეა, მაშინ, სტეფანე, მე შენი მშურს, რადგან უდარდელად გიცხოვრია. მესიჯი სტეფანეს: "ნიჭიერ კაცად გთვლი და ნიჭიერ და მაგარ მუსიკოსად რომ გთვლი, იმიტომ გებრძვი!". საჯაროდ მასზე ცუდი არასდროს მითქვამს. ლელას და მაოს მიღწევებსა და ორიგინალურობას კი დიდ პატივს ვცემ.
– თქვენი მისამართით ხშირად ისმის ბრალდება, რომ წინასწარ იცით, თუ ვინ იქნებიან თქვენი გუნდის წევრები.
– ერთი გამოსავალი ისაა, რომ გამიშვან შოუდან. სხვანაირად ეს პრობლემა ვერ გვარდება. თუ ვინმეს აქვს ილუზია, რომ იმხელა რესურსი გამაჩნია, საყოველთაო აღწერა მოვახდინო და კარდაკარ ვეძებო ნიჭიერი მომღერლები, ამას თუ ვინმე დაიჯერებს, ვერ ყოფილა ნორმალური.
– რას ასწავლით თქვენი გუნდის წევრებს?
– ვასწავლი საკუთარი თავის ფასს, როგორ გაუფრთხილდეს იოგებს. მე ოდესღაც მართლაც სახალხო მოვლენა ვიყავი, ფაქტია და სტატისტიკაა, რომ ჯგუფი "სახე" ძალიან პოპულარული იყო. ნეტა, კიდევ ვინმე იყოს ისეთი პოპულარული, როგორიც ჩვენ ვიყავით, ამაზე ვოცნებობ. მაშინ როგორი ურთიერთობაც მქონდა ხალხთან, რა ემოციასაც ვიღებდი მათგან, როგორც ვუბრუნებდი უკან და როგორც ვიცოდი თითოეული მსენელის ფასი, ახლა კონკურსანტებსაც იმავეს ვასწავლი. დამცინიან, როცა დაცვის წევრს ან დამლაგებელს ველაპარაკები. ფარისეველს და მლიქვნელს მეძახიან, რატომ ზემოდან არ ვიყურები, რატომ ვეფერები ყველას.
საერთოდ, ყველა თავისი გარყვნილების და გათახსირებულობის საზომით ზომავს ურთიერთობებს. ერთი პერიოდი საქართველოში სერიოზული კრიზისი გვქონდა, გვეგონა, რომ ყველაზე მაგრები ვიყავით, საბედნიეროდ, გადავლახეთ ეს. ახლა ახალი კრიზისი გვაქვს, გვგონია, რომ ყველაზე კეთილები ვართ, მაგრამ მალე აღმოვაჩენთ, რომ ჩვენზე კეთილებიც არსებობენ.
მე მგონია, რომ საქმე, რომელსაც ვაკეთებ, კარგად ვიცი. ბოდიში, თუ ვინმეს ყელში ამოგივიდათ ჩემი წარმატება! მაგრამ არ გავჩერდები, რადგან ერთხელ უკვე გავჩერდი და შოუბიზნესი დავტოვე... ნიჭიერი თაობა მოდის, რომელიც ნდობას მიცხადებს და რა ვუთხრა, შოუ დავაბალანსოთ და სხვა მწვრთნელთან წადით–მეთქი? ერთიც ვთქვათ, რა, მე "ახალი ხმით" არ გავმხდარვარ პოპულარული, მსმენელმა ჩემი ჯგუფით გამიცნო, აი, "სახე" იყო სწორედ შოუბიზნესი. იცით, როგორი მართალი ვარ? იცით, როგორ მშვიდად მძინავს? მადლობა ღმერთს ამისთვის.
– შემდეგი ეტაპი რა არის, თქვენი გუნდის წევრებს რა პერსპექტივა აქვთ?
– იმ კითხვებს, რომლებიც უნდა დაუსვათ მიხეილ სააკაშვილს და ბიძინა ივანიშვილს, მე ნუ მისვამთ! ქვეყანაში ცუდი ვითარებაა, შოუბიზნესი პრაქტიკულად არ არსებობს. წინა სეზონის კონკურსანტები მირეკავენ და ერთსა და იმავეს მეუბნებიან, მივდივარ ამერიკაში, საფრანგეთშიო. უცხოური ქვეყნის "ვოისზე" უნდათ გასვლა. რა ვუთხრა, დარჩით, არ წახვიდე–მეთქი? ისინი იმასაც მეუბნებიან, სტუდია ხომ გაქვს, რაღაც გაგვიკეთეო. ამ სტუდიას იჯარის ფულის გადახდა უნდა, აგერ სავარძელი ვერ მოგიტანეთ, რომ დამჯდარიყავით. ოდესმე გავძლიერდებით და რაღაც გამოჩნდება. თუმცა დღესაც არის იმის საშუალება, რომ ჩვენმა ღარიბმა მსმენელმა 20–30 მომღერალი შეინახოს...
– სტეფანესთან და მაიასთან მუშაობის გამოცდილება გქონდათ. ლელა წურწუმია როგორი პარტნიორია შოუში?
– მე და ლელა 1994 წელს "მასკვა–იალტა ტრანზიტში" ვმონაწილეობდით, მაშინ 20 წლის ვიყავი. მე ვუყურე, ლელამ რამდენი იწვალა და იშრომა. არ მაქვს უფლება, არ ვთქვა, რომ ის მებრძოლი პიროვნებაა და ურთიერთობაში საკმაოდ დელიკატურია. ჩვენ ყოველდღიური ურთიერთობა არ გვაქვს, მაგრამ ვმეგობრობთ. ჩვენ შორის არავითარ დაძაბულობას არ აქვს ადგილი, მაგრამ არ მინდა, რომ ლელა წურწუმიამ მოიგოს. მინდა, რომ ისევ მე გავიმარჯვო. გინდათ, ვთქვა, რომ ლელა წურწუმიას ვერ ვიტან ან მას ვძულვარ? არც ერთია სწორი და არც – მეორე, მაგრამ სადაც დაიჭერს შანსს, რომ მომიგოს, მომიგებს.
– ჩემი მიზანი არ არის, რომელიმე გაგალანძღინოთ...
– თქვენ კი არა, იმ ხალხს ვუგზავნი ამ მესიჯს, რომელსაც ხელოვნურად სურს, რომ ჩვენ შორის დაძაბულობა შექმნას.
"ფეისბუქზე" ჩემზე ვინმე ქრისტინე ლაზიშვილმა დაწერა, ეს ტიპი გულს მირევსო. რა დაგიშავე, შვილო?! დიდი ქალი არ იქნები, რახან ამას წერ, "სარკეშიც" გიკეთებ რეკლამას და პროექტშიც გაგიკეთებ. ვეცდები, თავი შეგაყვარო. ამის გამო მე ვარ შამანი!
– პირველივე ბრმა კასტინგზე დამრჩა შთაბეჭდილება, რომ მაია და სტეფანე კვლავ გუნდური პრინციპით მუშაობენ, თუმცა ცალ–ცალკე არიან მწვრთნელები. ასეა თუ არა?
– თუ თქვენ ეს შთაბეჭდილება დაგრჩათ, ეს მათი მინუსია. მოდი, მათ მინუსზე არ ვისაუბრებ.
– თქვენც ასე ფიქრობთ, რომ ისინი ერთი გუნდია?
– მე რას ვფიქრობ, არ აქვს მნიშვნელობა. მინდა, ბოლომდე უყუროთ ბრმა კასტინგებს, დააკვირდეთ ამ დეტალს, იქნებ მარტო ერთხელ მოხდა ან იქნებ ყველა გადაცემაში ერთი და იგივე მეორდება.
– როცა შესვენების დროს კულისებში იყრით თავს, მაშინ რა ხდება მწვრთნელებს შორის ?
– ჩემსა და სტეფანეს შორის ძალიან გულახდილი საუბარია ხოლმე, გულახდილად ვლანძღავთ ერთმანეთს, თუმცა ეს არ აისახება ჩვენს ურთიერთობებზე. სტეფანეს და ჩემი შვილი ძალიან ახლო მეგობრები არიან. კიდევ ერთხელ ვამბობ, სტეფანე არ არის ჩემს ცხოვრებაში ყველაზე ცუდი მოვლენა, მაგრამ კარგი იქნებოდა, უკეთესი მოვლენა იყოს, რადგან ერთმანეთისთვის მეტი სარგებლის მოტანას შევძლებდით. მე და სტეფანე თანამოაზრები ბევრ რამეში ვყოფილვართ. ყველგან იმას გავყვიროდი, რომ ის გემოვნებიანი მუსიკოსია, მაგრამ შოუში მასთან ბევრი პრეტენზია მაქვს. ზედმეტად ნერვიულობს და როცა ბრაზდება, ზედმეტად გულწრფელია თავისი ემოციების გამოხატვაში. ამით აგებს. ამ ტრიბუნიდან რჩევებს ვაძლევ ამას.
– წინა ჟიურის წევრებთან, ნინო ჩხეიძესთან და მერაბ სეფაშვილთან, შელაპარაკება არ მოგდიოდათ, მხოლოდ სტეფანესთან და მაიასთან გაქვთ დაძაბული ურთიერთობა...
– ბედნიერი ვარ ამით, მაიამ და სტეფანემ ალბათ ძალიან ღირსეულ მეტოქედ ჩამთვალეს. თუ დავინახე, რომ ზედმეტი ვარ, თუ დავინახე, რომ შოუს ორგანიზატორებს არ ვჭირდები, ახალი თაობისთვის გამოსადეგი არ ვარ, ამ პროექტს დავტოვებ. მაპატიეთ, თუ ყელში ამოგივიდათ დათო ფორჩხიძე; მაპატიეთ, რომ ისევ მოგება მინდა.
იცით, "ახალი ხმა" რა არის ჩემთვის? გამარჯვებული, მადლიერების ნიშნად, ბევრ დადებითს რომ მეტყვის. ამით დიდ სიამოვნებას ვიღებ. აქამდე მოსწავლეები არასდროს მყოლია, ახალმა თაობამ უამრავი რაღაც მასწავლა, შვილებთან ურთიერთობა გამიადვილა

დათო ფორჩხიძესა და მაია დარსმელიძეს შორის ომი გამოცხადდა?

დათო ფორჩხიძესა და მაია დარსმელიძეს შორის ომი გამოცხადდა?

დათო ფორჩხიძესა და მაია დარსმელიძეს შორის ომი გამოცხადდა? :: Comments