ანჯელინა ჯოლი: ლამაზმანი, მსახიობი, რეჟისორი, ცოლი და 6 შვილის დედა

Angelina Jolie Voight - დაიბადა 1975 წლის 4 ივნისს (სახელი მშვენიერ პატარა ანგელოზს ნიშნავს). მშობლები - მამა ცნობილი მსახიობი ჯონ ვოიტი, რომელმაც ფილმისთვის “შინ დაბრუნება” 1978 წელს “ოსკარი” აიღო, და დედა, ყოფილი მოდელი, ფრანგი მარსელინა ბერტრანი – ერთმანეთს მაშინ დაშორდნენ, როცა გოგონა 2 წლისაც არ იყო: “მამაზე არასდროს ვბრაზობდი. ყოველთვის ისეთ ადამიანად მეჩვენებოდა, რომლისთვისაც ქორწინება არ შეიძლება.”

მალე დედა ანჯელინასთან და მის უფროს ძმასთან - ჯეიმსთან ერთად ჭორებისგან თავის დასაცავად ნიუ-იორკში გადავიდა. საკმაოდ ხელმოკლედ ცხოვრობდნენ. არადა ხალხი ფიქრობდა, რომ იმ მსახიობის (თუნდაც ყოფილის) ოჯახს, რომელმაც “შუაღამის კოვბოიში” დასტინ ჰოფმანთან ერთად ბრწყინვალედ ითამაშა, ფულში უნდა ებანავა და ფუფუნებით უნდა დამტკბარიყო.

დაკრძალვაზე წაიყვანეს – ბაბუა გარდაიცვალა
ერთხელ 9 წლის ანჯელინა დაკრძალვაზე წაიყვანეს – ბაბუა გარდაიცვალა. გოგონა მოაჯადოვა ცერემონიამ – სამგლოვიარო სამოსი, ყვავილების გვირგვინები, მწუხარე მუსიკა. თურმე მოეჩვენა, რომ დედამიწაზე ამაზე მშვენიერი არაფერი არსებობს! იმ დროიდან მხოლოდ შავ სამოსს იცვამდა, სასაფლაოზე სეირნობდა, გამალებით კითხულობდა წიგნებს ბალზამირებაზე და მსახიობის დიდებულ კარიერაზე კი არა, დამკრძალავი ბიუროს მფლობელობაზე ოცნებობდა...

პედაგოგებთან ურთიერთობა რატომღაც არ გამოუვიდა. იმ ბავშვების სიაში ჩაწერეს, რომელთაც ფსიქოთერაპევტის დახმარება ესაჭიროებოდათ. “ამ კლასში წერდნენ ყველას, ვისი მშობლებიც გაიყარნენ. ჩვენი ფსიქოთერაპევტი სულ გვიმეორებდა, რომ ყველაფერში “წინაპრები” იყვნენ დამნაშავე. იმ საცოდავ ბავშვებად ვეჩვენებოდით, რომლებიც საზოგადოებაში საკუთარი ადგილის პოვნას ვერასდროს შეძლებდნენ.. ვარწმუნებდი, რომ თავს მშვენივრად ვგრძნობდი, მას კი არ სჯეროდა. ამიტომ ერთხელაც საშინელი ისტორია მოვიგონე და იმ სისულელით ძალიან გავახარე!”

მოგვიანებით არც მასწავლებელი და არც თერაპევტი ანჯელინას ვალში არ დარჩნენ. ენჯის დახასიათებაში შავით თეთრზე დაწერეს: “თავშეუკავებელი, მიდრეკილია სოციოპათიისკენ”. “ბავშვობიდან სოციოპათს მეძახდნენ. რომ წამოვიზარდე, გადავწყვიტე, რომ აუცილებლად უნდა მცოდნოდა, რას ნიშნავდა ეს სიტყვა. წიგნების მაღაზიაში მივედი და ვიკითხე: სადა გაქვთ ლიტერატურა სოციოპათებზე?”. გამყიდველმა, ვითომც არაფერი, მიპასუხა: მოძებნეთ რუბრიკაში “სერიული მანიაკები”... აი, მაშინ კი გავიფიქრე, რა კარგი კომპანია მყოლია-მეთქი.”

13 წლის ასაკიდან ანჯელინამ თავისი ცნობილი ცივი იარაღის კოლექციის შეგროვება დაიწყო. 14 წლისამ სახლში მეგობარი ბიჭი მოიყვანა, რომელთანაც 2 წელი იცხოვრა. მაგრამ ანჯელინას გამუდმებული მცდელობა, ეთამაშა სიკვდილთან, დანებთან ათასგვარი ექსპერიმენტი მისმა მეგობარმა ბოლოს და ბოლოს ვეღარ აიტანა.

16 წლის ენჯი კინაღამ მოკვდა, ექიმებმა ძლივს გადაარჩინეს – მორიგი სახიფათო თამაში საძილე არტერიასთან დიდი ჭრილობით დასრულდა... სწორედ მაშინ მიატოვა შეყვარებულმა. იმ დროის სამახსოვროდ ანჯელინას ტანზე სიკვდილის იაპონური იეროგლიფი, სვირინგი, შავი ჯვარი და დრაკონი დარჩა.

...მოგვიანებით მის ტანზე მეორე ქმრის სახელი “ბილი ბობი”, “H” გაჩნდა, სულ ბოლოს კი ტენესი უილიამსის ორი სტრიქონი: ”გულით ილოცეთ გალიაში გამომწყვდეული ველურებისთვის” (”A prayer for the wild at heart, kept in cages”). და მეორე: Quod me nutrit me destruit - “რაც მასაზრდოებს, ის მკლავს”.

დამოუკიდებელი ცხოვრება ანჯელინამ ძალიან ადრე დაიწყო. დარბოდა მოსმენებზე, იღებდნენ რეკლამებში, ცნობილ მუსიკალურ ჯგუფებთან სიმღერებს წერდა და საკუთარ თავს ყველგან მის ჯოლიდ წარადგენდა – არ სურდა მამის გვარით თავისმოწონება. მისი ერთ-ერთი პირველი დიდი როლი იყო ფილმში “კიბორგი-2: შუშის აჩრდილი”. როცა ფილმი უნახავს, უზარმაზარი ზიზღი უგრძვნია და ისევ დეპრესია დაუფლებია.

სიკვდილი ძველებურად უფრო მიმზიდველი და მშვენიერი ეჩვენებოდა, ვიდრე მლაშე და მოსაწყენი სიცოცხლე. მაგრამ ამ სიცოცხლესთან ანგარიშის გასასწორებლად ძალა მაინც არ ჰყოფნიდა.

- მაშინ ანჯელინამ საკუთარი თავის მკვლელობისთვის პროფესიონალი მკვლელი იქირავა. აქაც ზღაპრულად გაუმართლა. როგორც ჩანს, იმ ადამიანში მფარველი ანგელოზი იპოვა. "ვინ იცის, რა მოხდება. ცხოვრება ისეთი ცვალებადია! იქნებ ძალიან მალე ყველაფერი შეიცვალოს და ისევ სიცოცხლე მოგინდესო!" - უთქვამს დაქირავებულს. სასიამოვნო და სიმპათიურმა “პროფესიონალმა” გოგონას გადარწმუნება შეძლო და ფულიც არ გამოართვა. ის კაცი ანჯელინას აღარასდროს უნახავს...

უცნაური წინასწარმეტყველება ახდა. ერთ დღეს დედამ ურჩია, ახლახან მიღებული სცენარი არ გადაეგდო. გოგონამ დაუჯერა და მალე “ჰაკერების” გადასაღებ მოედანზე აღმოჩნდა. სისულელე იყო, რა თქმა უნდა, რაღაც კომპიუტერებზე, ჰაკერებზე და ა. შ. – მოკლედ, ფილმი თინეიჯერებისთვის იყო განკუთვნილი. სამაგიეროდ, ანჯელინამ გადაღების დროს ახალგაზრდა ინგლისელი მსახიობი ჯონი ლი მილერი გაიცნო. ერთმანეთი ერთი ნახვით შეუყვარდათ. ჯონის მისი უსიტყვოდ ესმოდა. ბევრ ადამიანს კიდევ დიდხანს ახსოვდა მათი “ლამაზი” ქორწილი. ახალგაზრდები ეკლესიაში შავი ტყავის შარვლებსა და თეთრ მაისურებში გამოცხადდნენ. პატარძლის მაისურზე, ზურგის მხარეს თავს იწონებდა წარწერა - ანჯელინას სისხლით მის მიერვე დაწერილი მომავალი მეუღლის სახელი.

ამის შემდეგ, ანჯელინამ - თითქოს ცხოვრებას და კინოს გემო გაუგოო - უამრავ ფილმში ითამაშა, სხვადასხვა ქვეყანაში და ქალაქში დადიოდა.

მოგზაურობები ცოლ-ქმარს ძალიან უშლიდა ხელს ერთად ყოფნაში. ანჯელინას საშინლად აღიზიანებდა ჯონის ვნება - კომპიტერული თამაშების საოცარი სიყვარული, განსაკუთრებით ერთ თამაშს - “ლარა კროფტი - აკლდამების მძარცველი” - ვერ იტანდა. ერთი სიტყვით, წელიწად-ნახევარში წყვილი გაიყარა. ანჯელინამ ბრალი საკუთარ თავზე აიღო: “ძალიან რთულია ჩემთან ცხოვრება. საჭმელს ვერ ვამზადებ, რომ მეხებიან, ვერ ვიტან, თავის მართლება არავისთან მიყვარს. ჩემს გვერდით რომ იყოს, მამაკაცმა ჩემი მართვა უნდა შეძლოს."

წლების შემდეგ ანჯელინა ბლოკბასტერში მონაწილეობაზე დათანხმდა, რომელიც სწორედ ამ საძულველი კომპიუტერული თამაშის მოტივებზე შექმნეს. ამბობენ, ეს ყოფილი ქმრის ჯიბრზე გააკეთაო. ასეა თუ ისე, სურათმა სუპერვარსკვლავად აქცია. ლარა - ჯოლის შესრულებით ჯეიმს ბონდისა და ინდიანა ჯონსის ერთგვარი ჰიბრიდის ქალური ვარიანტი იყო. სამსახიობო ოსტატობასთან თავისებური დამოკიდებლება ჰქონდა: როლებს კი არ თამაშობდა, როლებით ცხოვრობდა. როცა ფსიქოლოგიურ დრამაში “ჯია” შიდსით დაავადებული იტალიელი მოდელის როლში იღებდნენ, გრიმის გაკეთებაზე უარი თქვა და თავი გადაიპარსა... კატეგორიული უარი განაცხადა “ჩარლის ანგელოზებში” მონაწილეობაზე, დათანხმდა ნიკოლას ქეიჯთან “გაიტაცო 60 წუთში” მანქანის გამტაცებელი მოხერხებული ქალის როლზე.

ანჯელინა და ბილი
45 წლის ბილი ბობი ტორნტონს (ჰოლივდის სკანდალური ქრონიკების მუდმივ გმირს) მეგობრები გამუდმებით უმეორებდნენ, რომ აუცილებლად უნდა გაიცნოს ახალგაზრდა მსახიობი ანჯელინა ჯოლი; არწმუნებდნენ, რომ ისინი ერთმანეთისთვის არიან შექმნილი. ანჯელინა და ბილი, მართლაც, შეიყარნენ ერთი ფილმის გადაღებაზე. მაშინვე შეუყვარდათ ერთმანეთი. იმ დროიდან სულ ერთად ყოფნას ცდილობდნენ. ურთიერთობის აფიშირებას კი ვერ ახერხებდნენ: ბილი დანიშნული იყო მსახიობ ლორა დერნზე, ანჯელინას კი გაყრა არ ჰქონდა გაფორმებული.

საზოგადოებაში პირველად 2000 წლის მარტში გამოჩნდნენ ერთად. ანჯელინა მაშინ მეორეხარისხოვანი როლისთვის ფილმში “შეწყვეტილი სიცოცხლე” (Girl Interrupted) “ოსკარით” დააჯილდოვეს. ქორწილი ლას-ვეგასში გადაიხადეს. ცერემონიაზე, რომელიც სულ 189 დოლარი დაუჯდათ, რა თქმა უნდა, ჯინსებსა და მაისურში მიბრძანდნენ.

ენჯის მამამ ტელევიზიით შეიტყო შვილის დაქორწინების ამბავი და მორიგ ჭორად ჩათვალა. თავად ანჯელინა ამბობდა, რომ ტორნტონთან ქორწინება სერიოზული იყო და დიდხანსაც გაგრძელდებოდა. “ბილიზე ფიქრს რომ ვიწყებ, სუნთქვა მეკვრის. ყველაფერზე წავალ ოღონდ ერთი ზედმეტი წუთი გავატარო მასთან. ბილი ზუსტად იმავეს გრძნობს ჩემს მიმართ.”

“ფერი ფერს და მადლი ღმერთსო”, ასე იყო მათი საქმე. როგორც არაორდინალური ადამიანები, ერთმანეთს ბანალური სიურპრიზებით არასდროს ასაჩუქრებდნენ, თანაც ამ საქმეში გულმოდგინედ ეჯიბრებოდნენ ერთმანეთს. მაგალითად, ერთხელ ბილიმ პაწაწინა გოჭი, მის პიგი, მიუძღვნა; საპასუხოდ ანჯელინასგან 10 000 დოლარად შეძენილი შავი ლაკის ბილიარდის მაგიდა მიიღო.

იდილია ამჯერადაც კინომ დაარღვია. ანჯელინა საერთაშორისო ჰუმანიტარული მისიის თანამშრომელს თამაშობდა ფილმში “საზღვრის იქეთ”. როგორც ყოველთვის, ჯოლი როლში ისე შეიჭრა, რომ გადაღებების დამთავრებისთანავე აფრიკაში ლტოლვილთა საქმეებში გაეროს მშვიდობის ელჩად კამბოჯაში გაემგზავრა. ისე შეძრა იქ ნანახმა, რომ მილიონი დოლარი ერთ ბავშვთა თავშესაფარს შეწირა. სწორედ ამ თავშესაფარში ნახა ერთი პატარა ბიჭი. მოგვიანებით ენჯიმ დაიფიცა, რომ ბავშვს თავშესაფრიდან წამოიყვანდა. ბილიც კი დაითანხმა აფრიკაში გადაფრენაზე. სანამ ქაღალდები ფორმდებოდა, ბილი როგორღაც კიდევ იტანდა ამ იდეას, ოჯახში ახალი წევრის შემატების საწინააღმდეგოდ არაფერს ამბობდა.

იმ დროისთვის, “ლარა კროფტის” კონტრაქტის მიხედვით, ანჯელინას სამი წლის განმავლობაში ეკრძალებოდა ბავშვის გაჩენა. მაგრამ, როცა 8 წლის ბიჭუნა კალიფორნიულ სახლში გამოჩნდა, ყველაფერი შეიცვალა. ანჯელინა 24 საათი ბავშვთან იყო, საერთოდ გადაავიწყდა, ქმარი რომ ჰყავდა და მისთვისაც მოსიყვარულე ცოლი რომ უნდა ყოფილიყო. ბილიც გაერიყა ცოლს და გაზეთები რიგრიგობით აქვეყნებდნენ ცნობას მის ახალ-ახალ საყვარლებზე. ისინი ერთმანეთს დაშორდნენ და ანჯელინამ დაიფიცა, რომ პატარა მედოქსს არასდროს არაფერს მოაკლებდა.

“ჩემი სამსახიობო მონაცემები ძველებურია, როგორიც მქონდა, ისეთი დარჩა. უბრალოდ ჩემი ფიზიონომია უფრო ხშირადაა ჟურნალის გარეკანზე. რეჟისორებს ჩემი მიპატიჟება არ ეძნელებათ, პროდიუსერი აღარ ჰკითხავს: “ჯოლი? ვინ არის?” ისევ მაქვს რაღაც, რაც შემიძლია რეჟისორს შევთავაზო, ჩემს გმირებში ყველაფერს ვდებ და არასდროს ვთანხმდები როლზე, თუ დარწმუნებული არ ვარ, რომ ყველაზე მეტად მე შევეფერები. ამასთან არ მავიწყდება, რომ კინო ცხოვრება არაა. რაც უნდა იფიქროთ ჩემს გმირებზე, მე მათ არ ვგავარ. გამუდმებით ძიებაში ვარ და ეს პროცესი დაუსრულებელია.”

* * *
23 თებერვალს სანტა-მონიკაში, კალიფორნიის შტატში «Film Independent Spirit Awards» დაჯილდოვების ცერემონიაზე ჰოლივუდის ვარსკვლავმა ანჯელინა ჯოლიმ დაადასტურა, რომ ფეხმძიმედაა და საზოგადოებას თავისი პატარა მუცელი “აჩვენა”. ჭორები ბრედ პიტისგან მის ორსულობაზე მას შემდეგ გავრცელდა, რაც «Screen Actor's Guild Awards» - ზე ჯოლი ისეთი თავისუფალი თარგის კაბით გამოჩნდა, როგორსაც ძირითადად ფეხმძიმე ქალები ატარებენ. მაშინ ჭორების დადასტურება არ ისურვა. მოგვიანებით კი ვარსკვლავმა, რომელიც - ისევ და ისევ ჭორების თანახმად - ტყუპებს ელოდებოდა, ვიწრო შავ კაბაში ყველა ეჭვი გაფანტა.

* * *

ლამაზმა, კეთილმა და უცნაურმა... ანჯელინა ჯოლიმ ბავშვები აიყვანა, ღარიბების დასახმარებალად რეგულარულ ღონისძიებებს აწყობს, პლანეტის ყველაზე სექსუალური მამაკაცის ცოლია, უმრავი ადამიანი შენატრის... მაგრამ რას ფიქრობს მაშინ, როცა ოთახში მარტო იკეტება? ...ამაზე უამრავი გამოცემა წერს.

მისი გამონათქვამებიდან არა ერთხელ და ორჯერ, არამედ გამუდმებით ასკვნიან, რომ ის ქალების მიმართაც არაა გულგრილი: თუ მიყვარს, რა მნიშვნელობა აქვს სქესს? ჩემს თავში მამაკაცსაც ვგრძნობ და ქალსაცო. რამდენიმე ცნობილი ქალბატონიც ადასტურებს მასთან ინტიმურ კავშირს. თუმცა, ასეთი არაორდინალური პერსონის შემთხვევაში, მაშინ როცა ბრედ პიტთან ურთიერთობა კი არ ინგრევა, მალე ქორწილით დაგვირგვინდება, ჯოლის განცხადებები შეიძლება ყვითელ პრესის “ნერვებზე თამაშად”, ბოროტ რეკლამად ან საგანგებოდ შეთხზულ ისეთივე ფარსად მივიღოთ, როგორიც ერთ დროს, ბავშვობაში სკოლის ფსიქოთერაპევტის “გასახარებლად” მოიგონა...

ჯოლი-პიტი და 6 შვილი
ანჯელინა ჯოლის და ბრედ პიტის წყვილი 3 აყვანილ შვილს ზრდის: 6 წლის მედოქს ჩივანი (05.08.01) კამბოჯადან (ანჯელინა ამ ქვეყნის საპატიო მოქალაქე გახდა), 4 წლის ვიეტნამელი პაკს ტიენი (29.11.03) და ზახარა მარლი (08.01.05). სხვა სამი შვილიდან ერთი გოგონაა - შაილო ნუველი (27.05.06), ტყუპებს კი ნოქს ლეონი და ვივიენ მარშელინი (12.07.08) ჰქვიათ. ყველა ბავშვი ორმაგ გვარს ატარებს: ჯოლი-პიტი.

ფილმოგრაფია:

Salt 2 (announced)
2014Maleficent (pre-production)
2011Kung Fu Panda: Secrets of the Masters (video short)
2011Kung Fu Panda 2
2010The Tourist
2010Kung Fu Panda Holiday Special (TV short)
2010Salt
2008Wanted
2008Changeling
2008Kung Fu Panda
2007Beowulf
2007A Mighty Heart
2006The Good Shepherd
2005Mr. & Mrs. Smith
2004Alexander
2004The Fever
2004Sky Captain and the World of Tomorrow
2004Shark Tale
2004Taking Lives
2003/IBeyond Borders
2003Lara Croft Tomb Raider: The Cradle of Life
2002Life or Something Like It
2001Original Sin
2001Lara Croft: Tomb Raider
2000Gone in Sixty Seconds
1999Girl, Interrupted
1999The Bone Collector
1999Pushing Tin
1998Playing by Heart
1998Hell's Kitchen
1998Gia (TV movie)
1997Playing God
1997George Wallace (TV movie)
1997True Women (TV movie)
1996Foxfire
1996Mojave Moon
1996Love Is All There Is
1995Hackers
1995Without Evidence
1994Meat Loaf: Bat Out of Hell II - Picture Show (video)
1993Cyborg 2 (video)
1993Alice & Viril (short)
1993Angela & Viril (short)
1982Lookin' to Get Out

რეჟისორი:
2011 In the Land of Blood and Honey
2007A Place in Time (დოკუმენტური)

ანჯელინა ჯოლი: ლამაზმანი, მსახიობი, რეჟისორი, ცოლი და 6 შვილის დედა

ანჯელინა ჯოლი: ლამაზმანი, მსახიობი, რეჟისორი, ცოლი და 6 შვილის დედა

ანჯელინა ჯოლი: ლამაზმანი, მსახიობი, რეჟისორი, ცოლი და 6 შვილის დედა :: Comments